Correos Market

Correos Market da soilik enpresa nazionalen produktuak saltzearen alde egiten duen marketplace-a. Gure enpresa nazionalen sarea sustatze aldera, saltzaile guztiek izan beharko dute baimendutako pertsona fisiko edo juridikoak, euren jarduera ekonomikoan erregistratuta egongo dira eta Espainiako IFZ/IFK izango dute.

Saltzaileek indarreko osasun- eta lan-araudia (elikadura, edariak eta edergintza) bete beharko dute, kategoria guztietan.

Correos Market komunitatearen ongizatea bermatzea, horra gure lehentasunetako bat. Horregatik, guretzat gordetzen ditugu auditoretza-, beto- edo etete-eskubideak, baldin eta saltzaileek beharrezko baldintzak betetzen ez badituzte, edo, beren jarduera, edukia edo identitatea dela-eta, Correos Taldearen balore orokorren aurka egiten badute.

Gure helburua da  zure negozioa hurrengo mailara eramaten laguntzea. Zurekin ukondoz ukondo egin nahi dugu lan, zure eskaerak estaldura eta entrega-berme handienekin helaraziz.

Bidalketa-prozesua oso-osorik zaintzen dugu. Xede horrekin, astelehenetik ostiralera (jaiegunetan izan ezik) egingo dira bidalketak lurralde nazional osora, erosleak aukeran dituen Paq Premium edo Paq Estándar zerbitzuarekin.

Azken bezeroak hainbat entrega-aukera izango ditu eskura: bere etxean, Correosen bulego batean, edo CityPaq batean. 

• Etxean: zure bezeroak eskaera bere etxean jasoko duelarik, aurretik SMS edo posta elektroniko bidez jakinaraziko diogu. Horretarako, haren helbidea eman beharko diguzu; zu izango zara emandako datuen egiazkotasunaz eta benetakotasunaz erantzule. Zerbitzu horrekin bi entrega-saiakera egingo dira; beraz, paketearen pisuaren edo bolumenaren edo etxebizitzaren ezaugarrien ondorioz ezin bada etxean entregatu, kalean edo hurbilen dagoen Correosen bulegoan entregatuko da, zure bezeroarekin aldez aurretik adostuta. Entrega bulegora iritsia denean, 15 lanegun izanen ditu jasotzeko.
•  Correosen bulegoan: zure bezeroak nahi duen bulegoan jaso ahal izango du eskaera, 15 egun balioduneko epean, entregaren jakinarazpenaren SMSa edo mezu elektronikoa jaso eta hurrengo egunetik zenbatzen hasita.
•  Hau da bidaltzeko ordutegia: astelehenetik ostiralera 9:00etatik 21:00etara, eta larunbatetan 9:00etatik 14:00etara.

Jakinaren gainean izango zaitugu beti bidalketaren egoerari buruz, nola? Gure lokalizatzailearen bidez. Gainera, itzulketaren edo entregatzean izandako hutsaren arrazoiak eta hori konpontzeko hartu ditugun neurriak ere kontsultatu ahalko dituzu bertan.

Paketea ezin izan badugu entregatu lehen saiakeran, ez zaitez kezkatu! Bigarren entrega-saioa lehen saioaren biharamunean eginen da helmuga nagusietan, eta egun bat beranduago 10.000 biztanle baino gutxiagoko herrietan.

Produktuen prezioak BEZa barne dela erakutsiko dira, bai eta eskaintzan aplikagarri diren igoera edo deskontuak eta jasanarazten zaizkion gastu gehigarriak ere. Hala, bezeroak produktuaren azken prezioa jakin ahal izango du erosketa-orgara gehitu aurretik, ez baitu bidalketa-gasturik bere gain hartu beharko.

Erosketa-inprimakia betez eskaera bat egitean, une horretan indarrean dauden prezioak eta salmenta-baldintzak onartzen dira, eta, beraz, ezin izango dira aldatu bi aldeek berariaz adosten ez badute.

Ordaintzeko moduak zordunketa- edo kreditu-txartelak edo PayPal izango dira, eta bezeroak txartelaren laburpenean ikusiko duen kargua Correosen izenean egongo da. Gogoan izan batzuetan 60 egun arteko atzerapenak izan daitezkeela kobrantza-eragiketetan.

Bezeroak erosketaren faktura nahi badu, Correosek eskaera tramitatuko du eta garaiz igor dezazun jakinaraziko dizugu.

Bezero batek erositako produktuaren izakinik ez baduzu, egoera hori berehala jakinarazi beharko diozu Correosi, eta ordaindutako zenbatekoa itzuliko dizugu.

Kreditu- edo zordunketa-txartelarekin eskaera bat egitean ordainketa baimendu ondoren, bankuak eskaeraren zenbateko osoa atxikiko du onartzen duzun arte. Edozein arrazoirengatik ezeztatu behar izanez gero, bankuak ez du transferentziarik egingo eta dagokion zenbatekoa bezeroaren kontuan libratuko du berriro. Prozesu horrek 3 eta 5 egun natural bitartean iraun dezake; beraz, bezeroak onartu beharko du ez Correosek ez saltzaileak ez dutela erantzukizunik zenbatekoa bere kontuan libratzen bankua atzeratzen bada.

Correos Market-en, nahi duguna da bezero potentzialek zu ezagutzea eta zutaz ez ahaztea.  Trikimailu magiko bat dugu horretarako: zure produktu-fitxa da salmentaren gakoa, ezbairik gabe. Garrantzitsua da hori ondo zaintzea, hori izango baita zure aurkezpen-gutuna eta, beraz, zure aldetik jasotzen duten lehen komunikazio-inpaktua. 

Dagokion informazioarekin bidaliko dizugun fitxaren txantiloia bete besterik ez duzu egin behar bezeroari zure produktuaren funtsezko ezaugarriak jakinarazteko. Fitxaren eta bereziki, deskripzioaren eta argazkiaren helburua da erosleak erostera bultzatzea. Dena azaltzen dizugu:

•  Bezeroak beste produktu eta unitate batzuk sartu ahalko ditu orgatxoan, eta produktuak saltzaile ezberdinenak izan daitezke. Bi aukera izango ditu horiek erosteko: gonbidatu gisa edo saioa hasita. Zenbait produktutan, erregistratu egin beharko du erosketa egin aurretik.
• Bezeroak datu zehatzak eman beharko ditu, bidalketak gorabeherarik gabe eta behar bezala hel daitezen. Horrez gain, dagokion laukitxoa irakurri eta onartu beharko du, datuak gure datu-basean sartuko direlako. Horrela, eskaera prozesatu eta entrega egingo dugu.
• Bezeroak urrats horiek osatu dituenean, eskaera berretsi eta ordainketa egin beharko du, kreditu, zordunketa edo PayPal bidez. 
• Transakzioa berresten denean, bezeroak posta elektroniko bat jasoko du 24 orduko epean, eskaera berretsi dela jakinaraziz, eta ordainketa kargatuko zaio, erosketa egitean adostutako metodoaren bidez. Eskaera berresten bada, bezeroak beste mezu elektroniko bat jasoko du erositako produktuen deskribapenarekin eta eskaera-zenbakiarekin; halaber, mezu horrek erosketa behar bezala egin dela bermatuko du. Aitzitik, bezeroak mezu hori jasotzen ez badu, sarean unean uneko hutsen batengatik edo adierazitako posta-helbidean akatsen batengatik izan daiteke. Batean zein bestean, Correosek bezeroari gomendatzen dio gurekin harremanetan jartzea 
•  Bezeroa dagoeneko erregistratuta badago, eskaera bere gune pribatuan, Merchant Atarian, gordeko da.  Plataforma honetara behar duen guztietan sartu ahalko du, erregistratzean emandako erabiltzaile eta pasahitzarekin. Erregistratuta ez badago, ez dago arazorik: erosketan adierazitako helbide elektronikora bidaliko dizkiogu eskaeraren zenbakia eta jarraipena, une oro lokalizatu ahal izateko.

Zure salmentak denbora errealean kudeatuko ditugu! Zure bezeroek erosketak egiten dituztenean, jakinarazpen-ohar bat bidaliko dizugu, lanean jarri eta bidalketak prestatzen has zaitezen.

Garrantzitsua! Produktuen izakinak eguneratuta izanez gero, zure eskaerak behar bezala kudeatu ahalko dituzu, eta zure erosketa-esperientzia ezin hobea izango da. Gainera, Merchant Atariaren bidez kudeatu ahalko dituzu bezero bakoitzak erositako produktuak, eta bidalketen etiketak ere sortu ahalko dituzu, eskaerak gordailu-fasera igaro daitezen.

Correos Market-en malguak izatea gustuko dugu. Horregatik, saltzaileei euren itzulketa-politikak ezartzeko aukera emango diegu. Gure aldetik, mota horretako gorabeheraren bat sortzen denean, azken bezeroa saltzailearekin jarriko dugu harremanetan, elkarren artean itzulketarako konponbiderik onena aurki dezaten. 

Hala eta guztiz ere, garrantzitsua da gogoratzea ezen, indarreko araudian ezarritakoaren arabera, bezeroak ezingo dituela produktu hauek itzuli:

• Azkar hondatu edo iraungi daitezkeen elikagaiak.
• Zigilatutakoak, entregatu eta ireki ondoren osasun edo higiene arrazoiengatik itzuli ezin direnak.
•  Pertsonalizatuak, bezeroak jatorrizko produktua nolabait aldatu badu, xehetasun bakar zein pertsonalen bat sartuta, adibidez, izen baten serigrafia edo argazki bat. 

Saltzaileak, halaber, bere gain hartuko ditu kontsumo legetik eratorritako betebeharrak, eta egin duten kontratua indargabetzeko aukera emango dio bezeroari, beste alderdiari jakinaraziz eskaeraren entrega egiten denetik 14 egun naturaleko epean:

• Bezeroak eskaera berean produktu bat baino gehiago erosi baditu eta bereizita entregatu bazaizkio, azken produktua jaso duen egunetik hasiko da epea.
• Bezeroak produktua jatorrizko bilgarririk gabe itzultzen badu, erosketan ordaindutakoa baino diru gutxiago itzuli ahalko zaio.
• Saltzaileak ez badu Correosetik jaso bezeroak itzuli egin nahi duen eskaera baten ordainketa, Correosekin jarri beharko du harremanetan. Gu arduratuko gara bezeroari erosketagatik abonatu zuen zenbatekoa itzultzeaz. 

Kontsumitzailearen kezka handienetariko bat da nori erreklamatu produktu baten erosketan izandako edozein motako gorabeherarengatik. 

Correos Market bidezko auziak bezeroaren eta saltzailearen artean konponduko dira zuzenean, erosketa edo itzulketa prozesuetan behar ez bezalako erabilerarik egin den hautemateko beharrezko protokoloa aktibatuta.

Saltzaileak eta bezeroak enpresaburu eta kontsumitzaile izaera badute, Europako Parlamentuaren eta Kontseiluaren 2013ko maiatzaren 21eko 524/2013 (EB) Erregelamenduan xedatutakoaren arabera, Europako Batzordeak auziak judizioz kanpo ebazteko online plataforma bat eskainiko du, bezeroek bertan euren erreklamazioak aurkez ditzaten.

Correosek ez du inoiz erantzukizunik izanen honako egoera hauen aurrean:

• Bezeroak Correos Market-era sartzeari edo webguneko informazioa erabiltzeari buruzko edozein arau betetzen ez badu.
• Hirugarren pertsonek Correos Market-en agertzen diren marken edo produktuen izenak legez kontra erabiltzen badituzte.
• Saltzaileek emandako informazioaz egindako erabilera.
• Hirugarren zerbitzu-hornitzaileen egintzak eta omisioak, Correosekin kontratu-lotura izan ala ez.
• Zerbitzu-etenak, sarbide-hornitzaileek egindako akatsengatik, sarearen behin-behineko akatsengatik edo sistema informatikoaren, konexio- edo nabigazio-softwarearen, telefono-sarearen, ADSLaren, kablearen, satelitearen eta beste edozein garraio- edo komunikazio-azpiegituraren ondoriozko arazoengatik.
• Nahigabeko eta nahita eragindako interferentziek eragindako alterazioak: birusak, zerbitzarien erorketak, fitxategiak ezabatzea, datu-basean kalteak, suteak, leherketak, uholdeak, hirugarrenen indarkeriazko ekintzak, arazo elektrikoak (gehiegizko korrontea edo korronterik eza), edo ekipo zerbitzarien funtzionamenduan eta horietan gordetako informazioan eragina izan dezakeen edo eragina duen beste edozein.
• Bezeroaren zerbitzaria erortzea, gehiegi edo gaizki erabiltzeagatik, kanpoko erasoengatik, hardware edo software akatsengatik eta antzekoengatik.
• Zerbitzariaren funtzionamendu txarrak eragindako akatsak.
• Helbide elektronikoen aldaketen berri ez ematea Correosi. Saltzailea informazio hori garaiz emateko arduraduna da, arduragabekeria saihesteko.
• Correosen kontroletik kanpoko inguruabarrak, hala nola informazioa istripuz galtzea, saltzailearen ekipo terminalak gaizki erabiltzeagatik hondatzea, bezeroaren konfigurazioan akatsak edo hutsegitea edo antzekoak.
• Saltzaileak edo hirugarrenek telekomunikazio-sareetako akatsen edo deskonexioen ondorioz edo hirugarren zerbitzu-hornitzaileei egotzi ahal zaizkien arrazoiengatik jasan ditzaketen kalteak.
• Correos Marketen argitaratutako produktuetan gerta daitezkeen gorabeherak. Saltzailea da horien erantzule.
• Entrega-epea atzeratzea edo ez betetzea, Correosekin zerikusirik ez duten arrazoiengatik. Xedapen horrek ez dio eragiten bezeroak bere eskaera aurreikusitako epean jasotzeko duen eskubideari, ez eta dagokion itzulketa jasotzeko eskubideari ere, saltzaileak ezin badu eskaera adostutako epean entregatu. Horregatik, erantzukizuna saltzailearena izango da soilik.
• Saltzaileen eskaintza, ekintza, produktu eta edukirik ez.