Datos da Unión Europea apuntan a que as mulleres gañan menos ca os homes e a porcentaxe varía considerablemente duns países a outros. Por este motivo e para concienciar os cidadáns das diferenzas salariais, o Parlamento Europeo declarou o 22 de febreiro como Día Europeo pola Igualdade Salarial entre homes e mulleres, unha conmemoración que se fixo extensiva no ámbito internacional. A elección desta data ten que ver co número de días de máis que as mulleres deben traballar para situarse ao mesmo nivel salarial que os homes. De forma que o que eles cobran o 31 de decembro tras un ano traballado, as mulleres terían que facelo ata o 22 de febreiro para percibir a mesma cantidade.

A diferenza salarial entre homes e mulleres vén explicada por unha serie de factores como: a discriminación directa, xa que algúns homes gañan máis ca as mulleres no mesmo posto de traballo; la infravaloración do traballo, xa que traballos que requiren a mesma capacidade, cualificación e experiencia están infravalorados na muller; e segregación no mercado laboral, debido a que homes e mulleres tenden a traballar en empregos diferentes. Outros factores apuntan, ademais, a: tradicións e estereotipos, posto que as carreiras profesionais entre os dous xéneros tenden a ser diferentes pola formación educativa e, finalmente, a conciliación da vida profesional e a vida familiar, dado que as mulleres teñen máis dificultade para a conciliación, as tarefas familiares non están compartidas equitativamente e a taxa de emprego das mulleres con fillos dependentes é menor que no home.

Estudos realizados sobre a diferenza salarial de xénero indican que a eliminación desta suporía: a creación dunha sociedade máis xusta e igualitaria; a creación de empregos de calidade; beneficiaríanse as empresas, os traballadores/as, e diminuiríase o número de procesos e reclamacións.